మెగాస్టార్ చిరంజీవి (Chiranjeevi) అప్‌కమింగ్ సినిమాల విడుదల తేదీల చుట్టూ ప్రస్తుతం టాలీవుడ్‌లో సరికొత్త సంచలనం మొదలైంది. చిరంజీవి కథానాయకుడిగా తెరకెక్కుతున్న మోస్ట్ అవేటెడ్ మాస్ ప్రాజెక్ట్ ‘కాకా’ (Kaaka) వచ్చే ఏడాది జనవరి 13న సంక్రాంతి కానుకగా ప్రపంచవ్యాప్తంగా థియేటర్లలోకి వస్తుందని మేకర్స్ ఇప్పటికే అధికారిక ప్రకటన చేశారు. పండగ వాతావరణంలో బాక్సాఫీస్ వద్ద హంగామా చేసేందుకు మెగా కాంపౌండ్ పక్కా ప్లాన్‌తో ఉన్నట్లు అందరూ భావించారు. అయితే, అనూహ్యంగా ఇప్పుడు ఈ సంక్రాంతి రేసులోకి మళ్లీ ‘విశ్వంభర’ (Vishwambhara) పేరు రావడంతో సినీ వర్గాల్లో తీవ్ర కలకలం రేగుతోంది.
‘కాకా’ వాయిదా?
‘కాకా’ మూవీ ఒకవేళ అనుకున్న సమయానికి రాకుండా మార్చి నెలకు వాయిదా పడితే, ఆ ఖాళీ అయిన సంక్రాంతి బరిని ‘విశ్వంభర’ చిత్రంతో భర్తీ చేయబోతున్నారంటూ సోషల్ మీడియాలో వైరల్ గా మారింది. అత్యంత ప్రతిష్టాత్మకంగా రూపొందుతున్న ‘కాకా’ చిత్రం పోస్ట్ ప్రొడక్షన్ లేదా ఇతర కారణాల వల్ల మార్చికి షిఫ్ట్ అయ్యే అవకాశాలు ఉన్నాయంటూ ప్రచారం సాగుతోంది. ‘కాకా’ వాయిదా పడితే మాత్రం, ఆ పండగ విండోను వదులుకోకుండా గ్రాండ్ విజువల్ వండర్‌గా తెరకెక్కుతున్న సోషియో ఫాంటసీ మూవీ ‘విశ్వంభర’ను సంక్రాంతి బరిలో దింపేలా ప్లాన్ చేస్తున్నారని టాక్ వస్తోంది. పండగ సీజన్‌లో ఏ సినిమా ముందు వస్తుంది? చిరంజీవి కానుకగా సంక్రాంతికి ‘కాకా’ వస్తుందా లేక ‘విశ్వంభర’ థియేటర్లను కుదిపేస్తుందా అనే అంశంపై మెగా అభిమానుల్లో తీవ్ర ఉత్కంఠ, అయోమయం నెలకొంది.
అఫీషియల్ క్లారిటీ వచ్చే వరకు సస్పెన్సే!
సంక్రాంతి బాక్సాఫీస్ రేసు ఎప్పుడూ అత్యంత ప్రతిష్టాత్మకంగా ఉంటుంది. ఈ నేపథ్యంలో ‘కాకా’, ‘విశ్వంభర’ చిత్రాల విడుదలపై రకరకాల ఊహాగానాలు చక్కర్లు కొడుతున్నప్పటికీ, మెగా కాంపౌండ్ లేదా సంబంధిత నిర్మాణ సంస్థల నుంచి అధికారిక ప్రకటన వస్తే తప్ప ఈ అయోమయానికి తెరపడేలా లేదు!
