నేచురల్ స్టార్ నాని (Nani) హీరోగా, దర్శకుడు శ్రీకాంత్ ఓదెల దర్శకత్వంలో తెరకెక్కిన విజువల్ అండ్ మాస్ ఎంటర్‌టైనర్ ‘ది ప్యారడైజ్’ (The Paradise) ప్రస్తుతం థియేటర్లలో భారీ కలెక్షన్లతో దూసుకుపోతోంది. ఈ సినిమాలో కలెక్షన్ కింగ్ మోహన్ బాబు (Mohan Babu) ‘శిఖంజా మాలిక్’ అనే అత్యంత పవర్ ఫుల్ విలన్ పాత్రలో నటించి ప్రేక్షకులను మెప్పించారు. సినిమా గ్రాండ్ సక్సెస్ సాధించిన సందర్భంగా నాని, మోహన్ బాబు, శ్రీకాంత్ ఓదెల కలిసి పాల్గొన్న ఒక ప్రత్యేక ఇంటర్వ్యూలో మోహన్ బాబు చేసిన వ్యాఖ్యలు ప్రస్తుతం నెట్టింట విపరీతంగా వైరల్ అవుతున్నాయి.
డైరెక్టర్‌ను నిలదీసిన మోహన్ బాబు!
ఈ ఇంటర్వ్యూలో అందరినీ ఆశ్చర్యపరిచిన మరియు సరదాగా చర్చనీయాంశంగా మారిన అసలు సంచలన విషయం ఏమిటంటే.. డైరెక్టర్ శ్రీకాంత్ ఓదెల తనను దారుణంగా మోసం చేశాడని మోహన్ బాబు బయటపెట్టడం!
“శ్రీకాంత్ మొదట నా దగ్గరకు కథ చెప్పడానికి వచ్చినప్పుడు, సినిమాలో నాకు భార్య పాత్ర (హీరోయిన్) ఉంటుందని చెప్పాడు. మా ఇద్దరి మధ్య వచ్చే కీలక సన్నివేశాలను కూడా ఎంతో అద్భుతంగా వివరించాడు. దాంతో నేను కూడా ఓకే చెప్పి, ఆ రోల్ కోసం పాత కథానాయికలను కాకుండా కొత్తవాళ్లను తీసుకుందామని సూచించా. శ్రీకాంత్ కూడా దానికి తల ఊపాడు. కానీ కట్ చేస్తే.. షూటింగ్ మొదలై ఒక పెద్ద షెడ్యూల్ పూర్తయినా నాకు జోడీగా నటిస్తున్న భార్య పాత్ర సీన్లు తీయలేదు!”
అని మోహన్ బాబు వెల్లడించారు.
చావుకబురు చల్లగా చెప్పిన శ్రీకాంత్ ఓదెల!
అనుమానం వచ్చి తాను శ్రీకాంత్‌ను పిలిచి నిలదీయగా.. చావుకబురు చల్లగా చెప్పినట్లు అసలు విషయం బయటపెట్టాడని మోహన్ బాబు గుర్తుచేసుకున్నారు. స్క్రిప్ట్ వర్క్‌లో కొన్ని మార్పులు చేయడం వల్ల కథ మారిపోయిందని, అందుకే ఇందులో అసలు భార్య పాత్రే లేదని డైరెక్టర్ హ్యాండ్‌ఇచ్చిన విషయాన్ని సరదాగా మోహన్ బాబు వివరించగా.. పక్కనే ఉన్న నాని, శ్రీకాంత్ ఓదెల నవ్వులు పూయించారు.
పాజిటివ్ టాక్‌తో, రికార్డు స్థాయి వసూళ్లతో దూసుకుపోతున్న ‘ది ప్యారడైజ్’ విజయంలో మోహన్ బాబు విలనిజం ప్రధాన బలమని సినీ విమర్శకులు సైతం ప్రశంసిస్తున్నారు.
