నాచురల్ స్టార్ నాని, ఊరమాస్ డైరెక్టర్ శ్రీకాంత్ ఓదెల కాంబినేషన్లో వస్తున్న మోస్ట్ అవేటెడ్ పాన్ ఇండియా మూవీ ‘ది ప్యారడైజ్’ (The Paradise). గతంలో వీరిద్దరి కాంబోలో వచ్చిన ‘దసరా’ బాక్సాఫీస్ను షేక్ చేయడంతో, ఈ క్రేజీ ప్రాజెక్ట్పై ప్రేక్షకుల్లో అంచనాలు స్కై హై లో ఉన్నాయి. అయితే, ఈ సినిమా కోసం ఎంతో ఆత్రుతగా ఎదురుచూస్తున్న అభిమానులకు చిత్ర యూనిట్ షాకిచ్చినట్లు ఫిలింనగర్ సర్కిల్స్లో ఒక వార్త జోరుగా ప్రచారమవుతోంది. ఈ సినిమా విడుదల తేదీ మరోసారి వాయిదా పడినట్లు తెలుస్తోంది.
మూడోసారి మారిన విడుదల తేదీ!
నిజానికి ఈ సినిమాను మొదట 2026 మార్చిలోనే విడుదల చేయాలని ప్లాన్ చేశారు. కానీ కొన్ని కారణాల వల్ల దాన్ని ఆగస్టు 21కి వాయిదా వేశారు. ఇప్పుడు లేటెస్ట్ సమాచారం ప్రకారం.. ఆగస్టులో కూడా ఈ సినిమా రావడం లేదట. షూటింగ్ ఇంకా బ్యాలెన్స్ ఉండటం, అలాగే సినిమా ప్రమోషన్స్ కోసం తగిన సమయం లేకపోవడంతో మేకర్స్ ఈ నిర్ణయం తీసుకున్నట్లు సమాచారం. ఈ విజువల్ వండర్ను ఎక్కడా రాజీ పడకుండా ప్రేక్షకుల ముందుకు తీసుకురావాలనే ఉద్దేశంతో, దీని విడుదలను సెప్టెంబర్ 24కి పోస్ట్పోన్ చేసినట్లు ట్రేడ్ వర్గాల టాక్.
‘జడల్’గా నాని ఊరమాస్ అవతారం!
ఈ సినిమాలో నాని ‘జడల్’ (Jadal) అనే సరికొత్త ఊరమాస్ పాత్రలో కనిపించబోతున్నారు. దసరాను మించిన హై వోల్టేజ్ యాక్షన్ డ్రామాగా ఈ చిత్రాన్ని శ్రీకాంత్ ఓదెల తెరకెక్కిస్తున్నారు. ఈ క్రేజీ ప్రాజెక్ట్లో నానికి జోడీగా కయాదు లోహర్ కథానాయికగా నటిస్తుండగా.. కలెక్షన్ కింగ్ మోహన్ బాబు, సీనియర్ నటులు తనికెళ్ల భరణి, సోనాలి కులకర్ణి, ఈశ్వరీ రావు, బర్నింగ్ స్టార్ సంపూర్ణేష్ బాబు కీలక పాత్రల్లో మెరవనున్నారు. భారీ తారాగణంతో రూపుదిద్దుకుంటున్న ఈ సినిమా రిలీజ్ డేట్ మార్పుపై నెట్టింట ప్రచారం జరుగుతున్నప్పటికీ, చిత్రబృందం నుండి ఇంకా అధికారిక ప్రకటన రావాల్సి ఉంది.
