ఇప్పటివరకు కేవలం థియేటర్లలో విడుదలయ్యే వెండితెర సినిమాలకు మాత్రమే పరిమితమైన సెన్సార్ నిబంధనలు.. ఇకపై డిజిటల్ దునియాను కూడా చుట్టుముట్టబోతున్నాయి. ప్రముఖ ఓటీటీ (OTT) ప్లాట్ఫామ్లలో స్ట్రీమింగ్ అయ్యే కంటెంట్పై కేంద్ర ప్రభుత్వం త్వరలోనే కఠినమైన నిబంధనలు తీసుకురావడానికి సన్నాహాలు చేస్తున్నట్లు గట్టిగా సమాచారం వినిపిస్తోంది. ఇటీవల డిజిటల్ వేదికలపై చోటుచేసుకున్న కొన్ని వివాదాస్పద సంఘటనల నేపథ్యంలోనే కేంద్రం ఈ దిశగా అడుగులు వేస్తోంది.
సెన్సార్ బోర్డును కాదని ఓటీటీలోకి రూట్ మార్చడం వల్లే..
ప్రస్తుతం అమలులో ఉన్న చట్టాల ప్రకారం.. ఓటీటీ కంటెంట్ మొత్తం కేంద్ర సమాచార ప్రసార మంత్రిత్వ శాఖ నియంత్రణలోనే నడుస్తోంది. అయితే, ఈ డిజిటల్ చిత్రాలకు సెంట్రల్ బోర్డ్ ఆఫ్ ఫిల్మ్ సర్టిఫికేషన్ (CBFC) ముందస్తు అనుమతి లేదా సర్టిఫికేషన్ అవసరం లేదు. దీన్ని ఆసరాగా చేసుకుని, థియేటర్ రిలీజ్ కోసం సెన్సార్ బోర్డు నిరాకరించిన చిత్రాలను లేదా తీవ్ర వివాదాస్పదమైన కంటెంట్ను పలువురు నిర్మాతలు నేరుగా ఓటీటీల్లోకి వదిలేస్తున్నారు. ఇలాంటి ధోరణికి పూర్తిగా అడ్డుకట్ట వేయాలని కేంద్ర ప్రభుత్వం భావిస్తోంది.
వెబ్ సిరీస్లపై కూడా ముందస్తు నిఘా?
ఇందుకోసం ఉన్న నిబంధనలను సవరించి, ఇకపై ఓటీటీలలో వచ్చే సినిమాలకు కూడా ముందస్తు సెన్సార్ ధ్రువీకరణను తప్పనిసరి చేసేలా చట్టాన్ని తీసుకురావాలని ప్రభుత్వం యోచిస్తోంది. కేవలం సినిమాలతోనే ఆగకుండా.. భవిష్యత్తులో ఓటీటీ వెబ్ సిరీస్లను కూడా ఈ ముందస్తు సెన్సార్ పరిధిలోకి తీసుకురావాలా? వద్దా? అనే కీలకమైన అంశంపై కేంద్రం ప్రస్తుతం ఇండస్ట్రీ వర్గాలతో విస్తృతంగా చర్చలు జరుపుతోందని టాక్.
‘సత్లుజ్’ వివాదమే అసలు కారణమా?
ఇటీవల దిల్జిత్ దొసాంజే ప్రధాన పాత్రలో నటించిన ‘సత్లుజ్’ (Satluj) అనే చిత్రం దేశవ్యాప్తంగా తీవ్ర సంచలనానికి, వివాదానికి దారితీసింది. ఈ సినిమాకు సెన్సార్ బోర్డు భారీగా కట్స్ సూచించగా.. దానికి నిరాకరించిన చిత్రబృందం ఏమాత్రం వెనక్కి తగ్గకుండా ఎలాంటి కట్స్ లేకుండా డైరెక్ట్గా ఓటీటీలో స్ట్రీమింగ్కు పెట్టేసింది. అయితే దేశ భద్రతను, అంతర్గత శాంతిభద్రతలను దృష్టిలో ఉంచుకుని కేంద్రం రంగంలోకి దిగడంతో, విడుదలైన రెండు రోజుల్లోనే ఆ చిత్రాన్ని ఓటీటీ ప్లాట్ఫామ్ నుంచి శాశ్వతంగా తొలగించాల్సి వచ్చింది. ఈ తరహా ఘటనలు పునరావృతం కాకూడదనే ఉద్దేశంతోనే కేంద్ర ప్రభుత్వం ఓటీటీ కంటెంట్పై ముందస్తు సెన్సార్ కత్తిని ఝుళిపించేందుకు గట్టిగా ఫిక్స్ అయినట్లు తెలుస్తోంది.
