మెగాస్టార్ చిరంజీవి పుట్టినరోజు వేడుకల్లో ప్రముఖ నటుడు, నిర్మాత బండ్ల గణేష్ పాల్గొని సంచలన వ్యాఖ్యలు చేశారు. చిరంజీవి అంటే తనకు ప్రాణమని, ఆయనతో తనకున్న అనుబంధం మాటల్లో చెప్పలేనిదని ఎమోషనల్ అయ్యారు. వేదికపై బండ్ల గణేష్ మాట్లాడిన మాటలు ప్రస్తుతం నెట్టింట విపరీతంగా వైరల్ అవుతున్నాయి.
ఆయన లేకపోతే మా లాంటి వాళ్లు ఉండేవారు కారు!
టాలెంట్ ఉన్న ప్రతి ఒక్కరినీ గుర్తించి, ప్రోత్సహించి ఉన్నత స్థానంలో కూర్చోబెట్టడమే చిరంజీవి నైజమని బండ్ల గణేష్ కొనియాడారు. “ఒక సాధారణ వ్యక్తి స్వయంకృషితో ఇండస్ట్రీకి వచ్చి శిఖరాగ్ర స్థాయికి ఎలా చేరుకోవచ్చో నిరూపించిన మహానాయకుడు చిరంజీవి. ఆయన కనుక సినీ పరిశ్రమలోకి రాకపోతే నా లాంటి సామాన్యులు ఇండస్ట్రీకి వచ్చేవారే కారు. కష్టపడే మనస్తత్వం ఉంటే చాలు ఎవరైనా సాధించగలరనే కొండంత భరోసాని ఇచ్చిన వ్యక్తి ఆయన” అని తెలిపారు.
పాఠ్యాంశాల్లో చిరంజీవి చరిత్ర!
చిరంజీవి సాధించిన విజయాలు, ఆయన సాగించిన సినీ ప్రస్థానం భావితరాలకు ఆదర్శంగా నిలుస్తాయని బండ్ల గణేష్ అన్నారు. అందుకే చిరంజీవి జీవిత చరిత్రను పాఠశాల పాఠ్య పుస్తకాల్లో ఒక అధ్యాయంగా చేర్చాలని డిమాండ్ చేశారు. మెగాస్టార్పై బండ్ల గణేష్ చూపిన అభిమానం, చెప్పిన మాటలు మెగా అభిమానులను అమితంగా ఆకట్టుకుంటున్నాయి.
